"GUPAY KATINEUNG YAA RAMADHAN"

ti beurang...
tina hamparan nafsu nu kawengku ku amanah,
tina talaga lapar jeung hanaang nu kaikeut ku dogma kaimanan,

kuring pasrah kersa ning Gusti Nu Maha Suci.

ti peuting...
tina hamparan galindeng asih ayat-ayat suci nu kaumbar ku jiwa nu wening,
tina talaga taraweh lan saur nu pinuh ku barokah tur rahmat Illahi,
kuring tawadu kersa ning Gusti Nu Maha Suci.

katineung....
bagja ramadhan ayeuna jadi panineungan,
bagja ramadhan amit undur pikeun mubrak deui warsih payun,
bagja ramadhan geus katutup ku syawal nu mawa kasucian,
syawal nu mawa fitrah nu wening.
ayeuna...
cahaya syawal geus datang,
talaga kamenangan nyampeur kalbu nu suci,
hamparan pangampura merbak dina hate-hate nu wening asih,
pangikeut tali silaturahim,
ngajungjung kasucian ukuwah islamiyah.

ti kuring...
gupay pangjajap yaa ramadhan nu pinuh barokah,
gupay tineung yaa ramadhan nu pinuh pangampunan,
marhaban yaa syawal nu mawa fitrah,
syawal nu nanjeurkeun tali silaturahim.

yaa ramadhan, kuring nineung ditinggal ku anjeun,
yaa ramadhan, mugia urang sing pateupang deui warsih payun,
amien.....